დოლისყანის მონასტერი მდებარეობს ისტორიულ ნიგალში, სოფელ ჰამამლიში. 
დოლისყანა გრიგოლ ხანძთელის ეპოქაშია აგებული, საქართველოს სინად წოდებულ კლარჯეთის თორმეტ უდებნოთა შორის ერთ-ერთია. მონასტერი აშენებულია X საუკუნეში. მისი აგება უკავშირდება მეფეების _ ბაგრატ ადარნასეს ძისა და სუმბატ I-ის სახელებს. 
   კომპლექსიდან შემორჩენილია მხოლოდ მთავარანგელოზთა ტაძარი მინაშენებით. ნაგებობა ჯვარ-გუმბათოვანია (15,8X11,3 მ.). ეკლესია მოპირკეთებულია სხვადასხვა ფერის ქვებით. შენობის გარე შემკულობიდან განსაკუთრებით გამოირჩევა სამხრეთის მკლავის სარკმელი მთავარანგელოზთა გამოსახულებით. სარკმლის თავსართზე საქტიტორო წარწერაა. გუმბათის ყელის სამხრეთ-აღმოსავლეთ წახნაგში ჩადგმულია ფილა სუმბატ მეფის რელიეფური გამოსახულებით და წარწერით. დოლისყანის ტაძრის XI-XIII საუკუნეების მოხატულობა, თითქმის მთლიანად  განადგურებულია.
       XIX საუკუნიდან ტაძრის შენობაში მეჩეთი იყო გამართული, რამაც ნაგებობა დღემდე შედარებით კარგ მდგომარეობაში შემოინახა. 1999 წლიდან მეჩეთი სხვა შენობაში გადაიტანეს.